August 30th, 2010 by Shrikant Tiwari
#14
30,AUG`2010
Peechhe Maine “SHOLAY” tak ki posters post ki hai, baki ke baaaad mein…! Abhi kuchh katha-wachan ka mann hai…
1982 mein Main I.Sc. [intermediate] mein tha, jab “SATTE PE SATTA” release hui. Iss film ko Main release ke sath hi nahin dekh paya. Haan Mama, Ranchi ja kar dekh aaye thhe aur film ke kissse bade shaan se sunate thhe “…ki kis tarah “Baabu”, film mein Amit Ji ke doosre kirdaar[double role], ki entry hoti hai…”, aur hum chiddhte thhe. Baad mein yahin apne home town mein hi mitr-mandali ke saath dekha. Film comedy/thriller thi. Film ke sath koi yadgaar ghatna yaad nahin.
“BEMISAAL” uss waqt Maine dekhne ki koshish hi nahi ki, Main Amit ji ki sirf action pradhan filme jo pasand karta tha..hoon, ab tak nahin dekha.
“DESH PREMI” jab release hui thi tab Main Sw. Pui. Babuji ke saath Muzaffarpur apni badi didi ke sasural gaano-[village]- ‘Manikpur’ gaya tha. Mere bhanjo [didi ke dono putron] Sushil-Saurabh ka “yagyopaweet sanskaar” [janeu] hona tha. Wahan se laut-te samay Patna ke ‘Regent’ cinema mein Maine Babuji ke saath “DESH PREMI” dekha. Film mein character artists ki bheed thi. Iss film mein Sw. Uttam Kumar ko aur unke “Ghosh Babu” ke performance ko dekh kar main bahut prabhavit hua tha. Sw. Premnaath ‘Puttu Anna’ ke majedaar role mein thhe. Shammi Kapoor Sahab ‘Sardaar Shamsher Singh’ ke raubdaar role mein thhe. ‘Pariksit Sahani’ Ghulam Ali ki bhumika mein thhe. Sharmila Taigore ne kafi dino baad darshan diye. Fir bhi film ko ‘woh’ wah-waahi nahin mili thi. Film ka gaana “…khatoon ki khidmat mein salaam apun ka…” ne mujh par jadoo jaisa asar dala, aaz bhi uske prabhav mein hoon. Fir bhi iss film ko kahin-kahin kafi atishyokti-purnn dhung se dikhya gaya tha aur Sw. Manmohan desai ka nirdeshan unke apne kaabu se kuchh bahar fisalta dikha. Aam darshak bhi utne prabhavit nahi hue thhe. Lekin Main zidd ka mara, Amit Ji aur unke film ki aalochna sun kar rooth gaya tha. Babuji uss samay ghar par “Dharmyug” aur “Saptahik Hindustaan” namak ptrikayen magaya karte thhe jinke filmi parisishton ko Main bade chaao se padhta tha. Inn ptrikaon ka chhapna kab ka band ho chuka hai lekin meri bachpan ki bahut si yaadon mein ye aur inka yogdaan shamil hain.
…isske baad paradarshit hui iss saal ki Amit ji ki baki sabhi filme blockbuster, super hit rahin…
“NAMAK HALAL”…ek aur mile Stone! “…Pag Ghooghroo Bandh Meera Naachi Re…” Sw. Kishore Kumar ki khnanakti awaaz ke saath AMITABH BACHCHAN ka shandaar padarshan! Kya koi Hindi cine-premi bhool sakta hai !? Bakayada programme bana kar Ranchi ja kar Mama Ke sath ‘Uphaar’ cinema mein Maine apne pyare ‘Shri_Big`B’ ko …Arjun Singh, vald_Bheem Singh, vald_Dashrath Singh… ke roop mein nachte-gate-dhoom-dhamal machte dekha aur pichhli sare gile-shikwe bhul gaya.
…Issi samay hamari I.Sc. ki parikshayen aa gayin…
“KHUD`DAAR”[...fir ek mile-stone! ] ke release ke samay Main sanyog-vash fir ek baar Mama ke sath Patna mein tha, jahan manjhle jijaji ke chachere bhai Mohan Bhaia ji ke sath hum teeno ne ‘Regent Cinema’ mein iss film ko dekha. Iss film mein Sw. Sanjeev Kumar Sahab ki acting bahut-bahut shandar lagi thi, aur Amit Ji! wa!-wa-!!wa!!! Apne pure josho-jalaal mein thhe. kahin koi ratti barabar bhi oh! unh! nahin. Amitabh Bachcan puri film ko apne kandhe par ddhote hain aur super-hit se aage ki ’sangya’ par rakh dete hain. Iss film ki ek aur badi khasiyat yah thi ki ismein purane zamane ke jane-mane comediyan Sw. Mehmood bhi thhe, jo Chhotu Ustaad(amitabh bachchan) ke dost hote hain aur haath-tthele par “KELA” bechte hain, jinka ‘kele’-bolne ka andaaz wohi purana tha jiske liye woh mashhoor thhe. Yeh ek Yadgaar Amitabh Bachchan -brand- film thi. Aur film ke sabhi gaane bhi saal ke super-hit!!! Issmein bhi Amit Ji Holi khelte hain, aur Sw. Parween Babi ke saath Shri Krishna Janamashtami par “…mach gaya shor sari nagari re…” [Sw. Kishore Da ki awaaz mien] ga kar hamara dill jeet lete hain. Haal hi mein issi 'Janamashtami' ke din Amit Ji ne apne blog par iss gaane ki shooting ki chacha ki thi aur bataya ki Dahi-Mattha se bahri mitti ki 'gagari' ko apne sar[head] se maar kar todte hain jis-se unke sar se khoon bahne laga tha. “…aangreji mein kahte hai ki I love you…” 1982 ke ‘Binaka-Geet-Mala’ mein sarwa-shreshtth gane/song ka darja hasil karti hai. Iss film tak aate-aate Amit Ji ki lokpriyata sarochchttam shikhar par sthapit ho chuko hoti hai, jisse safalta ki parikashttha kahne mein mujhe koi atshyokti nahin lagta. Mere liye toh jaise woh mere apne bade bhaai ban gaye thhe. Main hamesha chaha karta tha ki mere balon ka style unke balon ki tarah dikhe. Jab bhi Main aaine ke samne khade ho kar apne balon ko kanghi karta tha toh badi nirasha hoti thi, fir bulb ki roshni mein apni parchhayin mein apne sar-mathe-baal ko niharta tha aur usme dekh kar dubara kanghi kar ke santosh pane ki asafal koshish karta tha. Amitabh Bachchan mere liye Ishwar ban chuke thhe.
Iske baad ki relase “SHAKTI” safalta/kamyabi ki puri eemarat hai. Iss film mein Mere Shri_Bib`B hamare desh ke gaurav hindi cinema ki diggaj murthi Shri Dilip Kumar Sahab ke saath milkar abhinay aur abhineta ki sarottam paribhasha ki rachna karte hain, jiske liye film ke producer/director dhanyawaad ke patr hain. Iss film ko dekhne ke samay Main Babuji ke saath sa-parivaar ”Gaya” ke ‘Maan-pur’ apni chacheri bahan ke sasural gaya tha, mujhe yaad aata hai Sushil-Saurabh bhi uss waqt hamare saath thhe. Hum chacheri bahan ke ’sasur’ (father in law) ke chehre ki tulna “SHAKTI” film mein Sw.Amrish Puri ke kirdaar ‘J.K. Verma’ se kar ke aapas mein khoob hanssa karte thhe. “Gaya” mein hum sabne milkar sa-parivaar “SHAKTI” dekhi. Film jaise Amitabh Bachchan ke ab tak ke pure filmi career ka ”punah:prasarann” si karti hui ek naya kirtimaan sthapit karti hai. Main Amit Ji ki safalta ko apni tarif samajh kar bahut khush hota tha. “SHAKTI” film mein achanak(!) Amit Ji ne badi gambheer bhumika nibhai jiske liye darshak shayad taiyar nahin thhe, ya fir uss waqt sanchaar sadhan aaz jaise high-tech nahi hone se koi purwa-suchna nihi thi. Amit Ji ne apne shandaar performance se darshakon ko stab'dh kar diya tha. Iss film tak Amit Ji ka chehara bahut paripakwa/mature, aur bade-pan+badappan ka ahsaas karata tha jo barbas unki izzat karne ko badhya kar deta hai. Aise hain mere Shri_Big`B!
“………..fir jaise kisi ki nazar lag gayi………..!”
…jari…
